Перейти к содержимому

Акафист преподобному Роману Киржачскому

Кондак 1

Избранный от лика ученик великаго аввы Сергия, тому не обинуяся в послушании спутешествовати изволил еси, в насаждении новыя обители Богородицы на Киржаче реце смиренно приял еси поприще своего служения Спасу Христу, сего ради восхваляет тя паства твоя, иночествующая в ней, и люди, чтущия тя, в благодарении вси зовущии:

Радуйся Романе, неусыпный и дивный молитвенниче о всех нас.

Икос 1

Ангелов светоносную чистоту возлюбив от юности твоея, Преподобне, светоносному поревновал еси житию учителя твоего преблаженнаго Сергия, подражая ему во всех добродетелех, того ради и мы, любовию побеждаеми, славим тя, зовуще:

Радуйся, Божественною любовию исполненный,

Радуйся, тоя огнем ко иноческому житию возженный.

Радуйся, во обитель Пресвятыя Троицы вселивыйся,

Радуйся, добрым сердцем ко Христу устремивыйся.

Радуйся, дивному Сергию всего себе в послушание предавый,

Радуйся, кротость и смирение от того унаследивый.

Радуйся, просвещенным умом Святей Троице послуживый,

Радуйся, честное обиталище Святаго Духа.

Радуйся, истинный святаго учителя ревнителю,

Радуйся, заповедей Христовых усердный исполнителю.

Радуйся, образе кротости духовныя,

Радуйся, яко достигл еси чистоты сердечныя.

Радуйся, Романе, неусыпный и дивный молитвенниче о всех нас.

Кондак 2

Видя подвиги и молитвенныя труды о Бозе великаго Сергия, Романе богомудре, уподобился еси тому в добродетелех вожделенным безмолвием и неослабным мужеством, купно же с ним умиленно воспевал еси ангельскую песнь Пресвятей Троице: Аллиллуиа.

Икос 2

Разум небесный стяжав, возненавидел еси суету мира сего, и восхотел еси удалиться мирскаго мятежа, о спасении души своея ревнуя и взыскуя паче всего Царствия Божия и правды Его; мы же, разумное желание твое ублажающе, воспеваем ти сице:

Радуйся, суету земную ни во чтоже вменивый,

Радуйся, Небесная сокровища возлюбивый.

Радуйся, в горняя течение свое направивый,

Радуйся, всего себе Единому Богу предавый.

Радуйся, яко добродетелей плод красный обрел еси,

Радуйся, яко сокрушение сердечное стяжал еси.

Радуйся, умиленныя молитвы Господеви возносивый,

Радуйся, вся страстная взыграния плачем угасивый.

Радуйся, страхом Божиим присно возгреваемый;

Радуйся, благоговейным служением учителя своего удививый.

Радуйся, священнаго безмолвия рачителю,

Радуйся, ветхаго человека страстей искоренителю.

Радуйся, Романе, неусыпный и дивный молитвенниче о всех нас.

Кондак 3 

Сила Божия укрепляше тя, преподобне Романе, егда мира отвергся, иноческое житие восприял еси. Темже обитель Пресвятыя Троицы, в ней же подвизался еси неленостно, Христу работая в посте и молитве, по слову аввы своего оставил еси и смиренно за ним последовал еси в Киржачские леса, верою воспевая Богу: Аллилуиа.

Икос 3

Имея мудраго наставника во иноческом житии, авву Сергия, во след за ним в пустынное обиталище мужественно исшел еси, ничтоже сумняшеся, в пути ему усердно послужил еси; мы же твоей верности всюду и полному послушанию удивляющеся, вопием ти таковая:

Радуйся, святое послушание воле Божией избравый,

Радуйся, верою и милующею любовию исполненный.

Радуйся, богоноснаго Сергия духовный сотаинниче,

Радуйся, светлая звездо иночества русскаго.

Радуйся, дерзновенную молитву ко Спасу стяжавый,

Радуйся, верою крепкою учителя умоливый о воде.

Радуйся, яко тем чудесне из горы источник изведен бысть,

Радуйся, правило веры и благочестия показавый.

Радуйся, Христа, яко бисер многоценный, обрел еси,

Радуйся, яко сердце теплотою Утешителя согрел еси.

Радуйся, светлый лучу Солнца Правды;

Радуйся, трудниче прилежный нивы Христовы.

Радуйся, Романе, неусыпный и дивный молитвенниче о всех нас.

Кондак 4

Бурею помышлений сумнительных смущаеми есмы, кто бо может по достоянию восхвалити житие твое; суровое пребывание в дебрех Киржачских, идеже ты, отче Романе, со учителем твоим веры и верности Христу непрестанно вопиял еси Дивному во святых Своих, в Троице славимому Богу: Аллилуиа.

Икос 4

Слышав богоносный святитель и новый чудотворец Алексий о смиренномудрии твоем, како в чину ученик своих преподобный Сергий сотвори тя, како избра тя из среды иноков своих и посла во град Москву священства благодать прияти от руки первосвятителя , с любовию тя прият и пастыря вернаго стаду твоему постави. Ныне убо и мы со слезами припадающе благодарственно вопием ти таковая:

Радуйся, яко в дебрь Киржачскую безбоязненно вселился еси,

Радуйся, яко молвы житейския тамо избегл еси.

Радуйся, аввою великим от среды ученик его избранный,

Радуйся, во игумена новыя обители премудро им поставленный.

Радуйся, горлица пустыннолюбная и добровидная,

Радуйся, непрекословный послушниче игумена великаго.

Радуйся, страже духовнаго рассуждения неусыпный,

Радуйся, сладкий плод послушания Христу принесый.

Радуйся, образ смиренномудрия и терпения нам явивый,

Радуйся, многих в подвизех иноческих укрепивый.

Радуйся, по лествице сияющих добродетелей к Небу возшедый,

Радуйся, яко красный цвете, в Горних селениях возблагоухал еси.

Радуйся, Романе, неусыпный и дивный молитвенниче о всех нас.

Кондак 5

Боготечней звезде подобен явился еси, Преподобне, наставляя люди земли Владимирския на путь спасения, темже молим тя, просвети и наша сердца, мраком житейских попечений омраченная, научая нас богоугодно житие сие тернистое проходити и достойно спасающему нас, молитв твоих ради, Богу воспевати песнь: Аллилуиа.

Икос 5

Видевше людие ближних и дальних весей и градов богоугодное житие твое, стекахуся во обитель Благовещения Пресвятыя Богородицы, яже на Киржаче реце, идеже ты, пастырь, по богомудром авве послушания ради поставляешися: инии притекаху желая услышати твоих душеполезных поучений, друзии же подвизатися вкупе с тобою хотяще. Ты же всех любезно приемля согревал еси сердца их любовию Божественною. Ныне убо и мы, смиренно к тебе прибегающе, сице глаголем:

Радуйся, яко житием святым своим весь пустынную просветил еси,

Радуйся, яко северную пустыню во град обительный преобразил еси.

Радуйся, приходящим к тебе путь в Горняя указавый,

Радуйся, великаго наставника приемниче достохвальный.

Радуйся, Пресвятей Владычице во обители Ея верно послуживый,

Радуйся, богоугодно в мире и тишине поживый.

Радуйся, пастырю добрый и долготерпеливый ко всем,

Радуйся, яко иноков стадо богомудро упасл еси.

Радуйся, сердечнаго плача богодухновенный учителю,

Радуйся, нестяжательнаго жития насадителю.

Радуйся, заблуждших кротостию исправляй,

Радуйся, приходящих к тебе смирению научаяй.

Радуйся, Романе, неусыпный и дивный молитвенниче о всех нас.

Кондак 6

Проповедник неленостный веры Христовы явился еси, преподобне Романе, боговедению и благочестию поучая братию свою и вся люди, во обитель Благовещения Пречистыя Владычицы нашея приходящия, словом спасения паче же святым образом жития твоего наставляя, да возмогут благоприятно пети Единому Истинному Богу: Алллилуиа.

Икос 6

Возсия светом богоразумия твоего людем земли Русския подвиги и труды твоя, мужественно Христа ради подъятыя, озари и нас лучами добродетелей твоих, да к тебе, яко к теплому о нас молитвеннику, вопием хвалебно:

Радуйся, воли Божией благоговейный слышателю и исполнителю,

Радуйся, чистоты душевныя и целомудрия рачителю.

Радуйся, скорбящих утешителю и нищих питателю,

Радуйся, незлобия и безгневия стяжателю.

Радуйся, книжныя премудрости наставниче предобрый,

Радуйся, прибегающих к тебе помощниче предивный.

Радуйся, овец Христовых пастырю верный,

Радуйся, благий вождю духовнаго воинства.

Радуйся, ревностный последователю отцев богоносных,

Радуйся, милостей Божиих присный ходатаю.

Радуйся, трезвения непрестаннаго ревнителю,

Радуйся, самоукорения и покаяния учителю.

Радуйся, Романе, неусыпный и дивный молитвенниче о всех нас.

Кондак 7

Хотя тесным путем и скорбным последовати Христу, нас ради путем крестным шедшему, пустынный труженник неутомимый показался еси; заповеди Господни совершив, достигл еси небеснаго воздаяния, от века угодившим Богови уготованнаго, идеже веселяся, благодарно вопиеши Творцу всяческих: Аллилуиа.

Икос 7

Новаго тя по благочестию ревнителя познав авва Сергий, с нимже всеусердно трудился еси в созидании новыя обители северныя. Господу споспешествующу, скоро храм Благовещения Пресвятыя Богородицы благолепно воздвижеся, идеже иноцы и людие мирстии воспеша ти сице:

Радуйся, яко вкупе с наставником своим обитель Пречистыя благоукрашал еси,

Радуйся, яко благоволение Небеснаго Отца стяжал еси.

Радуйся, веру несокрушимую в делех явивый,

Радуйся, небо церковное собою украсивый.

Радуйся, Христу уподобивыйся в совершенном терпении,

Радуйся, людей множество, чающих спасения, наставляяй.

Радуйся, святая чада о Христе приявый,

Радуйся, на пажити духовней тех добре препитавый.

Радуйся, молитвы чистыя смиренный стяжателю,

Радуйся, Таин Христовых благий раздаятелю.

Радуйся, благочестия святых добрый подражателю,

Радуйся, великий пред Богом угодниче.

Радуйся, Романе, неусыпный и дивный молитвенниче о всех нас.

Кондак 8

Странствовал еси во град Москву, отче Романе, изволением богомудраго учителя твоего, да благодать священства приимеши и наставления новаго чудотворца, пречестнаго Алексия, услышиши, како воспевати во вся дни Богови: Аллилуиа.

Икос 8

Всем воистину дивен явился еси, еще сый на земли в подвизех иноческаго жития; о Бозе и угождении Ему со ученики беседовал еси, умоляя чада своя духовная ничтоже предпочитати паче любве Христовы. Темже и мы, любовию побуждаемии, научихомся пети тебе таковая:

Радуйся, огнем страха Божия в себе страсти попаливый,

Радуйся, душу теплыми молитвами очистивый.

Радуйся, сердце покаянными слезами омывый,

Радуйся, яко ангел, во благочестии неослабно пребывый.

Радуйся, яко грешники сокрушению сердечному наставлял еси,

Радуйся, яко отец любвеобильный чадом духовным был еси.

Радуйся, веру, яко непоколебимый столп, утвердивый,

Радуйся, яко милосердию Господа ради приходящих к тебе научал еси.

Радуйся, венец небесный обретый терпением,

Радуйся, причастник блаженства ангельскаго явивыйся смирением.

Радуйся, кротостию Царствия Божия достигнувый,

Радуйся, нищету духовную стяжавый.

Радуйся, Романе, неусыпный и дивный молитвенниче о всех нас.

Кондак 9

Всякое духовное утешение почерпал еси, преподобне, от содружества с радонежским чудотворцем, тщася последовати того житию, славу земную ни во чтоже вменяти, честь временную презирати, воздержанием и молитвою Богови угождати. Темже иноков собиратель явился еси, от умиленныя души всегда зовый Господеви: Аллилуиа.

Икос 9

Житие богомудрое стяжал еси, имый душеспасительныя собеседования с досточудным аввою Сергием, словом богодухновенным от него назидаяся, да приходящим к тебе предукажеши верный путь ко Господу Богу, Спасителю нашему. Настави заповедем Божиим и нас, взывающих тебе тако:

Радуйся, Церкве Русския преславное похваление,

Радуйся, собора преподобных отцев световидное украшение.

Радуйся, смиренных на высоту небесную возвышение,

Радуйся, яко добродетельми душу, аки камением драгим, укрáсил еси.

Радуйся, сладколаголивый благовестниче,

Радуйся, богомудрый монахов наставниче.

Радуйся, лозо многоплодная винограда Христова,

Радуйся, добрый делателю вертограда Небеснаго.

Радуйся, светозарная звездо града Киржача,

Радуйся, Небесному Жениху души чад твоих уневестивый.

Радуйся, многоразличными подвиги подвизавыйся,

Радуйся, отечество Небесное наследивый.

Радуйся, Романе, неусыпный и дивный молитвенниче о всех нас.

Кондак 10

Спасения души твоея ища от юности, вся в мире сем красная яко лжа оставил еси и собранных тщанием игумена Троицкого иноков пастырь сподобился еси быти; богоугодно пожив, ныне на небесех предстоиши Господеви, Емуже на земли усердно служил еси, вопия: Аллилуиа.

Икос 10

Стена еси тверда обители Благовещения от врагов невидимых, темже и мы к заступлению твоему невозбранно прибегаем и молимся: от всяких нас бед и напастей заступай и ограждай, да взываем ти радостно:

Радуйся, чудотворцем и преподобным слыл еси,

Радуйся, молитвенниче за люд грешный неусыпный.

Радуйся, в мире развращенном праведно жизнь земную скончавый,

Радуйся, преселивыйся от земли бренной в Чертоги Небесныя.

Радуйся, яко присно за чада твоя предстательствуеши,

Радуйся, яко у Престола Божия о нас, недостойных, ходатайствуеши.

Радуйся, вшедый в вечную радость Господа твоего,

Радуйся, яко и по смерти землю Владимирскую не оставивый.

Радуйся, благодатию исцелений недужных от Христа Бога прославленный,

Радуйся, в день памяти твоея милость велию явивый.

Радуйся, скорбящую о чаде своем мать утешивый,

Радуйся, расслабленней отроковице здравие подавый.

Радуйся, Романе, неусыпный и дивный молитвенниче о всех нас.

Кондак 11

Пение всеумиленное приносим Христу Богу, прославляющему тя, преблаженне, яко дарова нам таковаго честнаго рачителя о спасении нас, грешных. Темже славим тя, просяще твоего молитвеннаго предстательства ко Господу, Емуже в радости блаженней сподобимся вечно воспевати: Аллилуиа.

Икос 11

Светом ангелоподобнаго иноческаго жития душу твою просвещенную увидев, первоучитель твой великий постави тя по себе пастыря иноков, им собранных во обители Благовещения, да будеши многим вождь во Отечествие Небесное, неленостно научая их спасению. Сие воспоминающе, молим тя: приведи нас ко свету спасения, и да сподобимся достойно благохвалити тя песньми сицевыми:

Радуйся, во время искушения огненнаго нас не оставивый,

Радуйся, от разорения град твой и обитель святую соблюдый.

Радуйся, от сокрушения храм Пречистыя Владычицы оградивый,

Радуйся, к теплым мольбам любящих тя слух приклонивый.

Радуйся, святыя мощи твоя, яко сокровище, явити изволивый;

Радуйся, милость велию от Царицы Небесныя получивый.

Радуйся, скоро прошения наша исполняющий,

Радуйся, небесный светильниче неугасимый.

Радуйся, милования источниче неоскудеваемый,

Радуйся, благодати Святаго Духа кладезю неисчерпаемый.

Радуйся, в делании заповедей сердца наша утверждаяй;

Радуйся, скорбящих о гресех всерадостно утешаяй.

Радуйся, Романе, неусыпный и дивный молитвенниче о всех нас.

Кондак 12

Благодатию священства озаренный, потщался еси всех к покаянию призывати, не презри и ныне люди града твоего, в суете сущия и молитвы на месте сем возносящия, да вкупе с тобою чистым сердцем вопиют Богу: Аллилуиа.

Икос 12

Поюще дивнаго во святых Своих Бога, в Троице поклоняемаго, преподобне отче наш Романе, восхваляюще многия подвиги и труды твоя в жизни сей, молим тя: не презри молебных пений наших душ и милостивно низпосли нам, грешным, дары благости Божия, ко спасению благопотребныя, да со умилением взываем ти сице:

Радуйся, всех святых земли Русския сонаследниче,

Радуйся, всем православным, с верою вопиющим тебе, скорый заступниче.

Радуйся, яко с богомудрым учителем твоим на небесех присно ликуеши,

Радуйся, яко ходатайством твоим чающих помощи спасаеши.

Радуйся, Отечества нашего благодатное прославление,

Радуйся, града твоего и земли Владимирския похвало и утверждение.

Радуйся, в скорбех сущих присное наше утешение,

Радуйся, Церкве Православныя драгое украшение.

Радуйся, тихий свете Киржачския земли,

Радуйся, чистое отражение Божественныя славы.

Радуйся, лучами святыни твоея нас озаряй,

Радуйся, милостивое заступление Божия Матере к нам приклоняяй.

Радуйся, Романе, неусыпный и дивный молитвенниче о всех нас.

Кондак 13

О великий и преславный заступниче наш, Романе всеблаженне! Припадающе с верою и любовию, прилежно молим тя: приими сие малое наше приношение сердец и испроси нам у Христа Бога в вере и благочестии утверждение, от всех бед и напастей вражиих избавление, сподоби же Царствие Небесное получити, в радости со всеми святыми поюще Спасителю нашему Богу: Аллилуиа.

Молитва

О предивный угодниче Божий, преподобне отче наш Романе! Града Киржача и земли Владимирския велие украшение, иночествующих богомудрый начальниче и всех притекающих к Тебе добрый наставниче! Ты глагола Сергия великаго послушал еси и твердым стопам его непоколеблимо последовал еси. Темже пастырь ревностный обители Благовещения Пресвятыя Богородицы во граде сем был еси. Ныне же, со дерзновением предстоя Престолу Вседержителя, неотступно молишися о чтущих и прославляющих святую память твою. Усердно и прилежно молим тя, отче предивне, неотступно предстательствуй о всех нас Всемилостивому Владыце Господу Иисусу Христу, да твоими теплыми и святыми мольбами дарует нам, немощным и многогрешным, оставление беззаконий наших, да обратит нас на путь Божественных заповедей Его, ведущих в жизнь вечную, да научит нас, окаменелых сердцем, спасатися слезами истиннаго покаяния. Испроси, угодниче великий, вышний мир и тишину граду твоему, обители твоей и стране нашей многострадальней, веры православныя утверждение, людем верным здравие и спасение, иночествующим во бдениях молитвенных и трудах укрепление. Огради нас молитвами твоими от всяких зол, бед и напастей, от лютаго нашествия иноплеменных, от врагов видимых и невидимых сохрани. Испроси нам у Всещедраго Царя и Бога время на исправление наше и в день Страшнаго Суда не остави нас без заступления твоего, да тако зде богоугодно поживше, сподобимся наследия вечнаго. Тамо бо, идеже ты со учителем твоим, богодухновенным аввою Сергием, со всем светозарным собором святых земли Русския и со всеми святыми непрестанно воспеваеши Безначальнаго Отца со Единородным Его Сыном и Всесвятым и Благим и Животворящим Его Духом ныне и присно и во веки веков. Аминь.